කොන්දේසි

1. හයිය කියන්නේ මොකක්ද

හයිය (haiya.site) කියන්නේ වැඩ කරන කෙනෙකුයි වැඩක් තියෙන කෙනෙකුයි හඳුන්වලා දෙන තැනක් විතරයි. ඊට වඩා දෙයක් නෙමෙයි.

අපි කිසිවෙකු රැකියාවට ගන්නේ නෑ. අපි කිසිවෙකුගේ නියෝජිතයෙක් නෙමෙයි. අපි කිසිම වැඩකට පාර්ශ්වයක් නෙමෙයි. හයිය හරහා හම්බවෙන දෙන්නෙක් අතරේ වෙන හැම දෙයක්ම ඒ දෙන්නා අතරේ විතරයි.

හයිය සම්පූර්ණයෙන්ම නොමිලේ. අපි කිසිවෙකුගෙන් ගාස්තුවක් ගන්නේ නෑ, commission එකක් ගන්නේ නෑ, කිසිම ගෙවීමකට අතරමැදියෙක් වෙන්නේ නෑ.

2. අපිට කරන්න බැරි දේ

ඕන කෙනෙකුට හයියේ ගිණුමක් හදන්න පුළුවන්. ඒ කියන්නේ වංචාකාරයෝ, බොරු නමින් ඉන්න අය සහ හොරු ලියාපදිංචි වෙන එක අපිට වළක්වන්න බැහැ.

අද deepfake සහ AI වලින් හදන ලියවිලි එක්ක, කවුරු හරි කියන කෙනාමද කියලා තහවුරු කරන එක කාටවත් සම්පූර්ණයෙන් කරන්න බැරි දෙයක්.

අපි පොලිස් වාර්තා බලන්නේ නෑ. අපි කිසිවෙකුගේ හැකියාව, අවංකභාවය හෝ වැඩේ ගුණාත්මකභාවය පරීක්ෂා කරන්නේ නෑ.

හයියේ chat එකක් නෑ. සම්බන්ධ වෙන්නේ දුරකථන අංකයෙන් — ඒ කතාව ඔයාලා දෙන්නා අතරේ. Profile එකක්, review එකක් හෝ job එකක් ගැන report කරන්න පුළුවන්.

ඒත් අපි කියවලා අනතුරක් කලින් නවත්තනවා කියලා පොරොන්දුවක් දෙන්නේ නෑ. ප්‍රශ්නයක් තියෙනවා නම් report කරන්න — ඒක තමයි අපිට දැනගන්න තියෙන ක්‍රමය.

3. සල්ලි

හයිය හරහා කිසිවෙකුට සල්ලි දෙන්න එපා. අත්තිකාරම්, bank transfer, top-up card, කිසිවක් එපා.

ගෙවීම කරන්නේ වැඩේ ඉවර වුනාට පස්සේ, ඔයා දෙන්නා අතරේ විතරයි. හයිය කිසිම ගෙවීමකට සම්බන්ධ නෑ, කිසිම ගෙවීමක් දකින්නේ නෑ, කිසිම ගෙවීමකට වගකියන්නේ නෑ.

කවුරු හරි සල්ලි හෝ අත්තිකාරමක් ඉල්ලුවොත් ඒක හයියේ නීති කැඩීමක්. Report කරන්න. එවැනි report එකක් ආවොත් පෙර විමසුමකින් තොරව ඒ ගිණුම අවහිර කරන්න අපිට අයිතිය තියෙනවා.

4. තීරණය සහ අවදානම ඔයාගේ

කාට කතා කරනවද, කවුරු හම්බවෙනවද, කවුරු ගෙදරට ගන්නවද කියන තීරණය ඔයාගේ. ඒකේ අවදානමත් ඔයාගේ.

වැඩක් දෙන්න කලින් ගාන, දවස් ගාන, ද්‍රව්‍ය කාගෙද කියලා කතා කරගන්න. පුළුවන් නම් ලියලා තියාගන්න.

ඔයාට හෝ ඔයාගේ දේපලට කිසිම හානියක් වුනොත්, ඒක හයිය සහ හයියේ හිමිකරුවන්ගේ වගකීමක් නෙමෙයි.

5. ගිණුම්

ඔයා දෙන තොරතුරු ඇත්ත වෙන්නම ඕන. බොරු නමක්, බොරු photo එකක්, බොරු දක්ෂතාවක් දාන එක තහනම්.

අවුරුදු 18ට අඩු කෙනෙකුට හයියේ ගිණුමක් හදන්න බෑ.

ඔයාගේ ගිණුම ඔයාගේ වගකීමක්. ඔයාගේ ගිණුමෙන් වෙන දේවලට වගකියන්නේ ඔයා.

නීති කැඩුවොත්, බොරු කිව්වොත්, වෙන කෙනෙකුට හානියක් කලොත් — පෙර දැනුම්දීමකින් තොරව ගිණුම අවහිර කරන්න හෝ මකන්න අපිට අයිතිය තියෙනවා. ඒකට හේතුවක් දෙන්න අපි බැඳිලා නෑ.

6. තහනම් දේ

බොරු ගිණුම්, බොරු reviews, spam, තර්ජන, හිරිහැර, වංචා, සල්ලි ඉල්ලීම, නීති විරෝධී වැඩ පළ කිරීම, වෙන කෙනෙකුගේ නමින් ඉන්න එක — මේ ඔක්කොම තහනම්.

වෙන කෙනෙකුගේ තොරතුරු එකතු කරන එක, ඒවා පිටතට දෙන එක, automated ක්‍රම වලින් site එකෙන් data ගන්න එක තහනම්.

7. ඔයා දාන අන්තර්ගතය

ඔයා දාන photos සහ විස්තර ඔයාගේම. ඒවා හයියේ පෙන්නන්න ඔයා අපිට අවසර දෙනවා.

නීති විරෝධී, අයෝග්‍ය හෝ නීති කඩන අන්තර්ගතයක් පෙර දැනුම්දීමකින් තොරව අයින් කරන්න අපිට අයිතිය තියෙනවා.

8. සේවාව

හයිය තියෙන විදිහටම ලබා දෙනවා. ඒක හැමවිටම වැඩ කරයි කියලා, කිසිම දෙයක් නැති වෙන්නේ නෑ කියලා, කිසිම වරදක් නෑ කියලා අපි පොරොන්දු වෙන්නේ නෑ.

සේවාව ඕන වෙලාවක, පෙර දැනුම්දීමකින් තොරව නවත්තන්න, වහන්න හෝ වෙනස් කරන්න අපිට පුළුවන්.

9. වගකීම් සීමාව

නීතියෙන් ඉඩ දෙන උපරිම සීමාව දක්වා, හයිය සහ හයියේ හිමිකරුවන් පහත දේවලට වගකියන්නේ නෑ:

(අ) කිසිම වැඩක ගුණාත්මකභාවය, ආරක්ෂාව හෝ නීත්‍යානුකූලභාවය · (ආ) profile එකක තියෙන තොරතුරු ඇත්තද කියන එක · (ඇ) ගෙවීම්, පාඩු, හානි, තුවාල හෝ ආරවුල් · (ඈ) පාවිච්චි කරන්නන් දෙන්නෙක් අතරේ වෙන කිසිම දෙයක් · (ඉ) හයිය හරහා හම්බවෙච්ච කෙනෙක් කරන කිසිම දෙයක්.

සේවකයා සහ සේව්‍යා අතර සිදුවන ගනුදෙනු, පහරදීම්, වංචා හෝ ඕනෑම නීති විරෝධී ආකාරයක කටයුත්තකට අප හයිය වේදිකාව කිසිදු ආකාරයකට වගකියනු නොලබේ. සම්පූර්ණ වගකීම සහ අවදානම ඔබ සතු වේ.

10. හානිපූරණය

ඔයා හයිය පාවිච්චි කරන එකෙන් හෝ නීති කඩන එකෙන් යම් නඩුවක්, පාඩුවක් හෝ නීතිමය ප්‍රශ්නයක් ආවොත්, හයිය සහ ඒකේ හිමිකරුවන් ඒකෙන් නිදහස් කරන්න ඔයා එකඟ වෙනවා.

11. ඔයාගේ දත්ත

අපි එකතු කරන දේ, තියාගන්නා කාලය සහ ඔයාට තියෙන අයිතිවාසිකම් රහස්‍යතා ප්‍රතිපත්තියේ ලියලා තියෙනවා.

ඔයා මේ කොන්දේසි වලට එකඟ වුන දිනය, අනුවාදය සහ භාෂාව අපි සටහන් කරගන්නවා. ඒක ඔයාත් අපිත් දෙන්නටම ආරක්ෂාවක්.

12. ආරක්ෂාව සහ දත්ත කාන්දුවක්

අපි ඔයාගේ දත්ත දැනට තියෙන හොඳම ක්‍රම අනුව ආරක්ෂා කරනවා: සම්බන්ධතාවය encrypt කරලා, දත්ත වලට යන දොර පේළියෙන් පේළියට සීමා කරලා, රහස් server එකේ විතරක් තියලා, දුවන code එකට සීමා දාලා.

අපි එකතු කරන දේත් අඩු කරලා තියෙනවා. හැඳුනුම්පත් අංකයක් හෝ උපන් දිනයක් අපි තියාගන්නේ නෑ. නොතියාගත්ත දෙයක් කාන්දු වෙන්නෙත් නෑ — ඒක තමයි හොඳම ආරක්ෂාව.

ඒත් කිසිම පද්ධතියක් සම්පූර්ණයෙන් ආරක්ෂිත නෑ. අද AI භාවිත කරන දියුණු cyber ප්‍රහාර, තාම හෙළි වෙලා නැති දුර්වලතා, අපි පාවිච්චි කරන වෙනත් සේවාවක ප්‍රශ්නයක් — ඒ වගේ දෙයකින් දත්ත කාන්දු වෙන්න පුළුවන්.

එහෙම දෙයක් වුනොත් ඒ නිසා ඔයාට වෙන කිසිම හානියකට හයිය හෝ ඒක පවත්වාගෙන යන අය වගකියන්නේ නෑ. ඔයා හයිය පාවිච්චි කරන්නේ ඒක දැනගෙන.

කාන්දුවක් වුනා කියලා දැනගත්තොත් අපි ඒක හැකි ඉක්මනින් නවත්තලා, බලපෑමට ලක් වුන අයට දැනුම් දෙනවා.

ⓘ මේ වගන්තියෙන් නීතියෙන් අපිට තියෙන යුතුකම් ඉවත් වෙන්නේ නෑ. ශ්‍රී ලංකාවේ පුද්ගල දත්ත ආරක්ෂණ පනත යටතේ අපිට තියෙන වගකීම් කලින් වගේම තියෙනවා.

13. නීතිය සහ වෙනස්කම්

මේ කොන්දේසි ශ්‍රී ලංකාවේ නීතියට යටත්. ආරවුලක් ආවොත් ඒක ශ්‍රී ලංකාවේ උසාවියකට යටත්.

කොන්දේසි වෙනස් වුනොත් අනුවාදය වෙනස් වෙනවා, ඒ එක්කම ඔයාගෙන් ආයෙ එකඟතාව අහනවා. පරණ අනුවාදයට එකඟ වුන සටහන එහෙම්මම තියෙනවා.